Andreas Mogensen Kalaallit Nunaannut tikissaaq

Qallunaat avataarsualiartartuata Andreas Mogensenip avataarsualiarneranik pissangallutik malinnaasimasut tamarmik naalagaaffeqatigiit erfalasui pingasut aamma nalussanngilaat: qallunaat erfalasuat Dannebrog, savalimmiormiut erfalasuat Merkið aamma kalaallit erfalasuat Erfalasorput.

Andreas Mogensenip erfalasut pingasut taakku nunat tamalaat avataarsuani sakkortusaaviannut ISS-imut nunarsuup ingerlaarfianut aallariartorami sapaatiummat aggustip 27-ani nassataasa ilagaat.

Andreas Mogensenip Columbusimi qaammatini arfinilinni angerlarsimaffiani nunarsuarmut angerlarnissami, marlunngornermi marsip aqqaneq-aappaata tungaanut uternissaata, tungaanut nivingapput. Andreas Mogensen ukiup affaani avataarsuani assiliarpassuarnik videoliarpassuarnillu assiliisarpoq; amerlanerit naalagaaffeqatigiit erfalasuinik pingasunik tunuliaqutaqarlutik.

Qallunaap avataarsualiartartup naapinnissaanik soqutiginnittorpassuaqarpoq, Sermitsiallu paasisai malillugit Andreas Mogensen tallimanngornermi juunip 21-ani inuiattut ullorsiornissaq sapaatip akunneranik sioqqullugu Kalaallit Nunaannut tikissaaq. Angalaneq marloqiusamik ingerlanneqassaaq: Siullermik Nuuk, tulliulluni Qeqqata Kommunia aamma Kommune Qeqertalik.

Nuummi tikeraarneq Kommuneqarfik Sermersuup, Danmarks Tekniske Universitetimi DTU Spacep aamma Europami avataarsuanut tunngasunik suliaqarfiup ESA-p suleqatigiinnerisigut aaqqissuunneqarpoq.

Qeqqata Kommuniani Kommune Qeqertalimmilu tikeraarneq kommuninit taakkunannga marlunnit aamma qallunaat avatangiisinik illersuiniaqatigiiffiannit Wild Nature Foundationimit, Kitaani nunamik eqqissisimatitamik peqalernissaanik ukiuni arlalinni suleqatigiissimasunit, aaqqissuunneqarpoq. 

Pilersaarusiortoqartoq sulili aalajangiisoqanngitsoq

Kommuneqarfik Sermersuumi attaveqaqatigiinnermut pisortap Lars Damkjærip uppernarsarpaa Andreas Mogensenip Nuummut tikeraarnissaa pilersaarusiorniarlugu kommunip DTU Space oqaloqatigigaa.

– Sulili aalajangiisoqanngilaq, Lars Damkjær oqarpoq.

Andreas Mogensenip, Sermitsiap paasisai aallaavigalugit, Kalaallit Nunaata erfalasua avataarsuarmeereermat illoqarfiullu ilinniarfiini atuartunut ilinniarusuttunullu saqqummiussereernermini tunniuppaa.

- Andreas Mogensenip Kalaallit Nunaannut aasaru tikeraarnissaata pilersaarusiornera ilumoorpoq, Danmarks Teknologiske Universitetimi Institut for Rumforskning og Rumteknologimi siunnersortaaneq Per Lundahl Thomsen oqarpoq.

– Ullut tikeraarfissat, tikeraarnermilu pisassat Kalaallit Nunaanni suleqatitsinnit assigiinngitsunit Europamilu avataarsuanut tunngasunik ingerlatsivimmit ESA-mit uppernarsarneqarnissaat suli sulissutigaarput.

– Pisussanut tunngassutillit assigiinngitsut sukumiinerusut, ullut aaqqissuussallu aalajangerneqareerpata, Kommuneqarfik Sermersooq Kalaallit Nunaannilu suleqatigineqartut allat tikeraarneq pillugu ilisimatinneqarumaarput, Per Lundahl Thomsen oqaluttuarpoq.

Naalagaaffeqatigiinni erfalasut pingasut

Andreas Mogensen 2015-imi siullerpaamik avataarsualiarngaarpoq. Taamani erfalasoq Dannebrog avataarsualiartaammi inimi nivingatillugu, taannalu erfalasoq Danmarkip Katersugaasivissuani maanna nivingavoq.

Naalagaaffeqatigiilli pingasuusut tamarmik immikkut erfalasoqarput: Danmark, Savalimmiut aamma Kalaallit Nunaat.

Andreas Mogensenip aappassaanik avataarsualiarnissaanik pilersaarusiornermi naalagaaffeqatigiinnermut tamarmut sinniisuunissaa pingaartinneqarpoq. Tamannali unammilligassaqartitsivoq. 

Naalagaaffeqatigiinnermi immikkoortut pingasut tamarmik naligiimmik pineqarniarneqarput, erfalasunilli pingasunik assigiinnik angissusilimmik nassaarnissaq ajornakusoorpoq. 

Københavnimi suliffeqarfiup Dahl Flagip ajornartorsiut aaqqippaa. Taakku erfalasut pingasut 30 x 50 centimeterisut angeqqatigiimmik mersorpaat. 

Nunatta Katersugaasiviata Allagaateqarfiatalu Erfalasorput avataarsuanut nassarneqarsimasoq soqutigisimagaluarpaat, Sermitsiamilli Andreas Mogensenip erfalasoq katersugaasivimmut tunniussimaneraa uppernarsarneqanngilaq. 

Ujarak Isua-meersoq avataarsuani 

Andreas Mogensen qallunaat avatangiisinik illersuiniaqatigiiffianni Wild Nature Foundationimi aamma ambassadøriuvoq, taakkualu avataarsualiarnissamut uumassusillit assigiinngisitaartut katersorpaat: 

Billiardinermit arsaasatut angitigisumut epoxyharpiksimik akimut ersittumut naqitaq. Taanna uumassusillit assigiinngisitaartunit arfineq-pingasunik imaqarpoq. 

Igutsak tungusunnitsuutilik, uppiup suluinit meqqoq taavalu Nuup Kangerluani Isukasianit ujaraaraq ujarassiuup Minik Rosingip nunarsuarmi uumassusillit pisoqaanerpaartaasa nassaarisimasaa ilaat. 

- Arsaasat marluupput; Andreas Mogensenip avataarsuanut nassataa taassumalu assinga allaffitsinniitsitarput, Irene Greve, Wild Nature Foundationimi pisortaq, oqarpoq.

- ”Arsaasat avataarsuarmiut” qanoq pineqassanersut suli aalajaginngilarput. Sammisanilli sumiiffiillu assigiinngitsut pillugit, ilaatigut Issittoq, eqqartuisinnaanermik iluaqutaapput.

Pinngortitamik illersuiniaqatigiiffik aamma kommunit marluk, Qeqqata Qeqertalillu, Kitaani nunami eqqissisimatitamik peqalernissaanik suleqatigiipput. Andreas Mogensenillu suleqatigineratigut anguniagaq alloriarfiussaaq.

– Qeqqata Kommunianit aallartitat peqatigalugit Andreas Mogensen Kangerlussuarmi naapissallugu pilersaarusiorpugut, tassanilu qularnanngitsumik Isunnguata Sermia ornissavarput. 

- Tamatuma kingorna Sisimiunut aamma Aasiannukassaagut, Qeqqata Kommuniani borgmesteri Malik Berthelsen aamma Kommune Qeqertalimmi borgmesteri Ane Hansen peqatigalugit nunat allanngutsaaliukkat takornariarnissaat neriuutigaara. Andreas Mogensenip tikitamini oqalugiartarnissaa aamma ilimanarpoq. 

- Andreas Mogensen nunarsuarmut uterami paasinartumik ulapissimanera ilimanarpoq, taamaammat Wild Nature Foundationip kommunillu taakku marluk angalaniarneq aaqqissuussaat suli uppernarsarneqarsimanngilaq, Irene Greve oqarpoq.