Akerliussutsimik takutitsisut 50-it missaanniittut Kielsen tusarnaarusunngilaat
Aalisarnermut piniarnermullu naalakkersuisup aalisarnermut inatsisissatut siunnersuut pillugu Naalakkersuisut oqariartuutaat aalisartunut saqqummiutinngimmagu tupaallaatigineqarpoq. - Akerliussutsimik takutitsinerminnut atatillugu oqaasissakka tusarusunngilaat, taamaattumik taama pisoqarpoq, Kielsen Sermitsiamut nassuiaavoq.
Annonse
Inatsisartut ataatsimiinnerat ullumi pisoqarfiungaatsiarluni aallartippoq. Ataatsimiinneq unitsikkallarlugu Inatsisartut siulittaasoqarfiat nalunaaquttap akunnerani ataatsimi ataatsimiipput ataatsimiinnerullu imarisaa tamanut saqqummiunneqarani.
Nalunaaqutaq 14.30 missaani ullormut oqaluuserisassaq pingaarnerpaaq, tassa aalisarneq pillugu Inatsisartut inatsisaannut siunnersuut, oqaluuserineqarpoq.
Aalisarnermut Piniarnermullu Naalakkersuisoq Kim Kielsen oqalugiarsinnaanini sivitsorlugu Kalaallit Nunaanni aalisarnerup siunissaa pillugu Naalakkersuisut takorluugaannik aalisarnermilu inatsisit tunngaviusut qulakkeernissaannut inatsisinik saqqummiussivoq.
Tamannali sioqqullugu aalisartut piniartullu kattuffiata KNAPK-p aaqqissugaanik akerliussutsimik takutitsisoqarpoq.
Jeremiassen: Politikerit naalleraapput
Aalisarnermut Piniarnermullu Naalakkersuisoq Kim Kielsen oqaaseqartikkusunngikkaat.
KNAPK-p siulittaasuata Nikkulaat Jeremiassenip oqalugiaatimini piffissap annersaa Naalakkersuisut Inatsisartullu siulittaasutut sulinerminik akornusersuiniarlutik sapinngisartik tamaat iliuuseqarsimasut eqqartorpaa.
KNAPK-p tapiissutinik pissarsisarunnaarsimanera (siunnersuisarfik KONFIFA aalisartunik siunnersuisartoq, neqeroortitsinerup kingorna SQRK-mut KNAPK-mi siulittaasuusimasup Henrik Sandgreenip siulersuisuinut tunniunneqartoq) assersuutigalugu eqqaavaa.
Aalisartut aalisarunnaartariaqarnissartik ernummatigigaat
Akerliussutsimik takutitsiniarlutik sooq aalajangersimanerlutik Nikkulaat Jeremiassenip nassuiarpaa.
Naalakkersuisut aalisarnermut inatsisissaannut siunnersuutaannut tunngatillugu isornartorsiuinerit arlallit oqaluttuarai.
KNAPK tusarniaanermut akissummini allamik aalisarnermut inatsimmik, kattuffik naapertorlugu sinerissap qanittuani aalisartunut pitsaanerpaamik isumaginnittumik, suliaqartoqaqqullugu kaammattuisimavoq.
Siunissami pisassiissutit inuttut ataasiakkaatut tunineqarsinnaalernissaat namminneq aalajangerneqarsinnaalernerata aalisartunik ikilisaasoqarnissaanik inatsit sunniuteqassasoq KNAPK-mit isumaqarpoq.
- Aalisarnermut inatsit maannatut isikkoqartoq akuerineqarpat ilaasortatta affaat aalisarunnaassasut suliffissuarnilu sulisut suliassaarutissallutik, Jeremiassen oqarpoq.
Royal Greenland KNAPK-p oqarneratut eqqugaanavianngimmat, tamannalu tunisinermi naapertuilluartumik akilersuinissaq aalisartunullu bonusinik tunniussinissaq piumasarineqarani, KNAPK-p aamma naammaginngilaa
- Tusarniaanermi siunnersuutigisavut aalisartunut iluaqutaasinnaasut tusaaniarneqanngillat, taamaattumik aalisarnermut inatsisissatut siunnersuutigineqartoq aalisartunut iluaqutaanavianngilaq, Jeremiassenip oqaasii taama naalisarneqarsinnaapput.
Allaaserisap matuma allanneqarnerani partiit aalisarnermut inatsisissatut siunnersuut pillugu oqaaseqaatitik saqqummiuppaat.
