Aatsitassarsiorfik tunumi akuersissutaateqartoq pinngitsaaliissummik matuneqalersoq
Skærgårdenimi Tasiilap Ittoqqortoormiillu akornanni qaqqat ilisimatusartunit aatsitassarsiortunillu soqutigineqarput, kisianni ingerlatseqatigiiffiit saffiugassat niuerutigineqalernissaat ajornartorsiutigaat. Skaergaard Mining maanna pinngitsaaliissummik matuneqaleruttorpoq.
Annonse
Miki Fjordip aamma Kangerlussuup akornanni kangerluit qaqqanik immikkuullarissumik qaleriiaarsimasut ilisarnaatigaat – ujaqqat qaleriiaarneri taamaattut ilisarnaataapput. GEUS-imi ilisimatusartut qaqqani aatsitassarsiorfiit qaqqallu pillugit ilisimasanik katersanik nutaanik marlunnik saqqummersitseqqammerput, taakkulu qillerinikkut qaqitat 20 tonsinik oqimaassusillit, ukiuni qulikkaani paasissutissanik katersinikkut aamma ilisimatuussutsikkut misissuinerpassuit tunuliaqutigalugit suliarineqarput.
– Skærgårdenip nalaa arlalissuartigut nunarsuarmi ilisimaneqarluartuuvoq, Troels F. D. Nielsen, ujarassiooq aamma GEUS-imi soraarneq taama oqarpoq. Skærgårdimi qaqqap innermik anitsisartup qaleriissiartuaarnera ilisimatusartut ullumikkut qaqqap innermik anitsisartup qaqqanngortarneranik paasinninnissaannut iluaqutaasimasoq oqaluttuarpoq.
– Skærgård-intrusionen anngap kilometerisut marlussuttut nunap qaanit portutigisumut qanoq qaleriiaarluni, qaqqatut gabbrotut ilisarneranik nassuiarluarneqarsimasuni siulliuvoq. Ujaqqat qaleriiaarnerat taamaalilluni ilisimatuussutsikkut qaqqap pinngorneranut paasinninnermut tunngaviulluinnarsimavoq. Tamatuma saniatigut 300 kubikkilometerit missaanniittut gabbro metalit soorlu kuultit aamma palladium nassaassaapput, taakku ingerlatseqatigiiffiit misissuisut atussallugit soqutigilluinnarpaat.
Power to X
Palladium saffiugassaavoq qasertoq qaamasoq nalitooq, taanna platinimut eqqaanarpoq, ilaatigullu katalysatorinut, pinnersaatinut aamma saffiugassanik aatsitsinermut atorneqartarluni.
– Kisianni palladium aamma immap brintimut aamma iltimut immikkoortinnissaannut atorneqarsinnaavoq. Power to X-imi taamaaliortoqartarpoq. Taamaattumillu palladium pingaaruteqarnerulersimavoq, Troels F. D. Nielsen oqaluttuarpoq, taassuma palladium 5 meterisut issutigisoq nalilerpaa aamma kuultimut 1-2 meterit, taannalu nunap qaleriiaartup qeqqaniippoq.
- Paladiumip kuultillu qanoq annertutiginerat oqaatigiuminaatsorujussuuvoq, aamma qanoq naatsorsuisimaneq apeqqutaavoq. Apeqqutaavorli saffiugassanik qaqqamit piiaanerup nalinga tuniniaanerup nalinganit akisunerussanersoq. Aatsitassarsioqatigiiffiit tamanna oqimaaqatigiissaarissutigiuarpaat.
Pinngitsaaliissutaasumik matuneqartoq
Ukiut ingerlaneranni suliffeqarfiit assigiinngitsut arlallit tassani misissuinissamut akuersissutinik pigisaqarput, ilaatigut Eastern Zinc Corporation, Gryphon Metals Corporation, Platinova Resources, Galahad Resources aamma Platina Resources.
Maanna Canadamiut suliffeqarfiutaat Major Precious Metals Skaergaard Mining A/S-imik tamakkiisumik piginnittoq, pingasunik ujaasinissamut akuersissutaateqarpoq, 107 km2-inik, 16 km2-inik aamma 754 km2-inik, imaluunniit katillugit 877 km2-inik. Misissuinerit taamaattut suli aatsitassarsiornermik ingerlatsinermik kinguneqarsimanngillat, sulilu aallartikkallarnavianngillat. Tassami Skaergaard Mining A/S maanna matutinneqarpoq. Tamanna CVR-imi nalunaarsuiffimmi allassimavoq. Aatsitassanut Aqutsisoqarfik Sermitsiamut ilisimatitsivoq ingerlatseqatigiiffik oqaloqatigisimallugu, soorlu ingerlatseqatigiiffik pinngitsaaliissummik matuneqaraangat, akiliisinnaajunnaaraangat assigisaanilluunniit pisoqaraangat taamaaliortarneq nalinginnaasoq.
Qillerinerit misissueqqissaarnerillu
2021-mi Major Precious Metals sumiiffimmi tassaniippoq qillerinermik ingerlatsilluni, tassanilu 10 kvadratkilometerit missaanniittumi qillerinermit qaqitat 32-t takisuut tiguaat. Tamatuma saniatigut sumiiffinnit assigiinngitsunit sisamanit 250 meterit kuulti, palladium, platin saffiugassarpassuillu allat misissorneqarput. Aammattaaq umiarsuarmik assartuisartumik assartuineq misilinneqarpoq. Kalaallit assartuinermik suliffeqarfiutaata Xploration Servicesip Tunumi sulineq kiffartuussiffigaa. Aatsitassarsiorfik pillugu nalunaarut kingulleq juunimi 2022-mi saqqummiunneqarpoq, Major Precious Miningimi allassimavoq misissuinerit uppernarsaraat suliffeqarfik nunarsuaq tamakkerlugu pingaaruteqartunik palladiumimik kuultimillu pisuussuteqartoq, aamma pisuussutinik pitsanngorsaanissamut suliniuteqarfiullu allilernissaanut periarfissaqartoq.
Suliffeqarfik Canadap kitaata sineriaani Vancouverimiittoq 2022-mili juunimiilli nipaappoq. 2023-mili oktobarimi pisortaanerup Anthony (Tony) Williamsip pisortallu tulliisa Joel Dumaresq aamma Fred Tejadas soraarnerat pissutigalugu pisortat allanngortinneqarnerat annertuvoq.
