Aalisarnermi soraarnerussutisianut tunngatillugu nalornisoqartoq
Naalakkersuisut aalisarnermik piginnittut amerlanerulissasut aamma kalaallit soraarnerussutisiaqalernissamut aningaasaateqarfiisa aalisarnermut aningaasaliisinnaanerat ammaatissavaat. Naalakkersuisulli inatsisissatut siunnersuutip immikkoortuani qitiusumik allannguinissamut piareersimanngillat, naak tamanna SISA Pensionip isumatusaartumik aningaasaliinissamut pingaaruteqartutut isigigaluaraa.
Aalisarnermut inatsisissatut siunnersuut naapertorlugu raajarniarnermi qaleralinniarnermilu pisassiissutit ukiuni qulini atuuttussaapput. Piffissaq taanna sivikippallaarpoq, SISA Pension isumaqarpoq, siunnersuutigalugulu piffissaq pisassiissuteqarfiusoq marloriaatinngortinneqassasoq.
- Sivisussusiliineq raajanut aamma qaleralinnut ukiut 10 aammalu assagiarsunnut tunngatillugu ukiut 5 imatut isumaqassasoq aningaasaliissuteqarnermi aarlerinaatip ukiut 10 aamma ukiut 5 nalilersuutinut ilaassasut. Tassalu imatut aamma isumaqarpoq iluanaarutisiassatut piumasaqaatit ukiuni siullerni qaffasissuunissaannik, tamannalu siuarsaataanavianngitsoq Soraarnerussutisiassanik Katersivik, SISA, illua-tungisisamut (tuniniaasumut) akigitinneqartussat pillugit isumaqatiginninniarneranut, aningaasaliissuteqarniarnerullu piviusunngortinniarneranut, soraarnerussutisiassanik katersivik SISA tusarniaanermut akissummi oqaaseqarpoq.
Tusaajumanngitsut
Inatsimmi nutaami kalaallit soraarnerussutisiaqalernissamut aningaasaateqarfii aalisarnermut aningaasaliisinnaalersinneqaraluartut aningaasanillu “nutaanik” pissarsisinnaalersinneqaraluartut, Naalakkersuisut SISA Pensionip pisassiissutit sivitsorneqarnissaat pillugu kissaataanut tusarnaarusunngillat.
- Naalakkersuisut SISA-p isumaatut isumaqanngillat, ukiullu qulit pisassat agguataarneqartarnerat attatiinnarniarlugu, SISA Pensionip tusarniaanermut akissutaanut naatsumik taama oqaaseqartoqarpoq.
Oqaatigineqarporli soraarnerussutisiaqalernissamut aningaasaateqarfiit aalisarnermut aningaasaliissutaat annikitsunnguussasoq.