Af redaktionen
28-07 2010 - 11:23
Kujataani inuussutissalerinermik suliaqartut, akunnittarfiit, neriniartarfiit, neriartortarfiit inuppaaluillu piumassuseqarluartut suleqatigalugit nittartagaq www.mamartut.gl pilersinneqarsimavoq.
Nittartakkami saqqummiunneqarput Kujataani nerisassiarineqartartut, suliffeqarfiit nerisassallu tunisassiarineqartartut nioqqutissallu sumi pisiarineqarsinnaanersut nittartakkami innersuussutigineqarput.
- Kujataanittaaq nerisassanik inuussutissanillu ikigisassaanngitsunik soorlu savaaqqat, savat, nersussuit neqaat, naatsiiat, naatitat, aalisakkat, saattussat, akuutissat igutsaat sukkui allanillu sassaalliutissarpassuaqarpoq, Inuussutissarsiornermut Suliffeqarnermullu ataatsimiititaliami siulittaasoq Kalistat Lund oqarpoq.
Nittartakkami fiilmip 'A taste of Greenland'-imi oqaluttuarineqartut saqqummiunneqartullu siorna immiunneqarsimasup saniatigut kalaaliminerngit pillugit isumassarsiffigineqarsinnaasorpassuarnik najoqqutassaqarpoq.
- Kujataani inuussutissaqarluarnera pillugu pissutissaqarluarpugut oqassalluta Kalaallit Nunaat tamakkerlugu inuussutissarpassuarnut Kujataani peqqumaasiveqartoq. Pitsaasorujussuarnik nioqqutissarpassuarnik peqarpugut, taamatullu amerlanerusut kalaaliminernik atuinerulernissaat, avataanit nioqqutissanik eqqussuiinnarnerup annikillisarnissaa, nunaqavissunik sulisoqarnissaq, suliffinnik pilersitsiortornissaq kiisalu isumassarsisitsinissaq siunertaralugu nittartagaq saqqummiivittut atussavarput, Kalistat Lund oqarpoq.
Inuussutissarsiornermut Naalakkersuisoqarfimmit Kommune Kujallermi nittartakkap suliniutigineqarnissaanut tapiiffigineqarnikuuvoq.
For at kommentere, skal du registrere dig som bruger. Hvis du allerede har f.eks. en Facebook-profil, kan du let komme i gang bare ved at trykke på Facebook-ikonet (1).
Mere vejr
16°C